減3500卡＝輕1磅 營養師教OL踢走高脂高熱量餸菜
發布時間： 2018/08/02 15:50
最後更新： 2020/05/18 12:41
▲ OL以為帶飯有助減肥，但如果吃了高脂餸菜，對瘦身並無幫助。
昨日約OL朋友食飯，張櫈都未坐暖就叫我做「評判」。心想究竟發生什麼事？原來她們近期要快速瘦身，加入帶飯行列，議論邊份午餐較好，所以就想搵我做「評判」。
當我逐一聽完她們午餐食哪些餸之後，心想她們是真心減肥嗎？睇睇先：煎雞翼、雲耳炒枝竹、涼瓜炒腩肉等，再加白飯（1碗約260kcal），雖則食材、用油、醬料份量都比出外進食少，但就忽略了食材質素，如果餸菜熱量高、脂肪高，為減肥而帶飯都是白費心機。
以上述餸菜為例，雞翼、枝竹及腩肉皆屬受歡迎的帶飯餸菜，除了方便及容易處理，還有「輕食」感覺。不過，這三款食物熱量及脂肪一點都不少！雞翼本身近骨，含油量較高，加上連皮一齊食，熱量及脂肪量大大增加。不要以為豆品類就是健康，枝竹經過油炸，加上吸收餸汁效果强勁，令枝竹比起一般豆腐的熱量及脂肪還要高。
至於腩肉，就好像我們的肚腩一樣，都是儲存脂肪的地方。想減肥的朋友建議避免揀這類食材！
【邪惡食材之選】
| 食材 (100克) | 熱量 | 脂肪 (以多少茶匙油計算) |
| 豬腩肉 | 368 kcal | 6.7 茶匙油 |
| 枝竹 | 478 kcal | 4.9 茶匙油 |
| 連皮雞翼 | 266 kcal | 3.8 茶匙油 |
【健康食材之選】
| 食材 (100克) | 熱量 | 脂肪 (以多少茶匙油計算) |
| 去骨瘦豬扒 | 214 kcal | 2 茶匙油 |
| 軟豆腐 | 68 kcal | 0.4 茶匙油 |
| 去皮雞胸 | 148 kcal | 0.7茶匙油 |
其實，只要在食材上作少少改變，就可以將飯盒熱量及脂肪量減低。例如：將去皮雞胸代替雞翼、軟豆腐代替枝竹、瘦豬扒代替豬腩肉等。除此之外，粟米肉粒、時菜肉片、鮮茄牛肉都是不錯的配飯及較低脂健康之選。按成年女士一日需要大約1,500kcal計算，午餐建議攝取400至500kcal。
| 食物 (1份約300克) | 熱量 | 脂肪 (以多少茶匙油計算) |
| 時菜肉片飯 | 360 kcal | 1.4 茶匙油 |
| 粟米肉粒飯 | 360 kcal | 1.4 茶匙油 |
| 鮮茄牛肉飯 | 360 kcal | 1 茶匙油 |
想帶飯食得健康一點點，就不要忘記食材的質素了！
更多減肥貼士，請【按此】。
【延伸閱讀】Häagen-Dazs VS Mövenpick雪糕甜度比拼 高糖加速皮膚老化
撰文 : 張雅媛（Tunice） 新西蘭註冊營養師
